बाबाजी दाते कला आणि वाणिज्य महाविद्यालय, यवतमाळ 

Babaji Datey Kala & Vanijya Mahavidyalaya, Yavatmal

(वाणिज्य महाविद्यालय, यवतमाळ ट्रस्ट रजि. क्र. ई-३२ द्वारा संचालित)

NAAC Accredited B++ Grade with CGPA 2.82

क्रीडा विभाग – दाते महाविद्यालयात ‘क्रीडा महोत्सव तरुणाई २०२४’ संपन्न

बाबाजी दाते कला आणि वाणिज्य महाविद्यालय यवतमाळ येथे क्रीडा महोत्सव तरुणाई २०२४ दि. ६, ७ फेब्रुवारी २०२४ या कालावधीत आयोजित करण्यात आला. या क्रीडा महोत्सवामध्ये मुलांसाठी क्रिकेट व व्हॉलीबॉल तर मुलींसाठी रस्सीखेच स्पर्धा आयोजित करण्यात आली होती. क्रिकेट मध्ये एकूण १८ संघ सहभागी झाले तसेच व्हॉलीबॉल मध्ये ८ संघ सहभागी झाले होते तर रस्सीखेच मध्ये ८ संघ सहभागी झाले.
व्हॉलीबॉल मध्ये प्रथम क्रमांक बी. कॉम भाग २ च्या विद्यार्थ्यांनी पटकावला दुसरा क्रमांक बी. ए. भाग २ ने तर तृतीय क्रमांकावर एन.एस.एस. संघ राहिला.
रस्सीखेच मध्ये ८ संघ सहभागी झाले होते. त्यामध्ये प्रथम क्रमांक बी. ए. भाग १ ने पटकाविला दुसरा क्रमांक एन.एस.एस. ने तर तृतीय क्रमांक एन.सी.सी च्या विद्यार्थ्यांनी पटकावला.
क्रिकेट मध्ये १८ संघ सहभागी झाले होते त्यामध्ये प्रथम क्रमांक बी. कॉम. भाग १ च्या विद्यार्थ्यांनी पटकावला दुसरा क्रमांक एम. कॉम. ने तर तृतीय क्रमांक बी. कॉम भाग ३ ने पटकाविला. क्रीडामहोत्सवाच्या उद्घाटन प्रसंगी कार्यक्रमाच्या अध्यक्ष महाविद्यालयाच्या प्राचार्य डॉ. वर्षा कुळकर्णी होत्या. तर उद्घाटक म्हणून यवतमाळ जिल्हा व्हॉलीबॉल असोसिएशनचे सचिव श्री. प्रमोद धुर्वे व क्रिकेटचे प्रशिक्षक श्री. विजय मालवी हे होते. प्रमुख अतिथी म्हणून वाणिज्य महाविद्यालय न्यासाचे अध्यक्ष मा. श्री विनायक दाते व महाविद्यालयाच्या विश्वस्त सौ. सुषमा दाते उपस्थित होते. या कार्यक्रमाचे प्रास्ताविक महाविद्यालयाचे शारीरिक शिक्षण विभागाचे संचालक डॉ. रविजीत गावंडे यांनी केले तर आभार प्रदर्शन वाणिज्य विभागाचे प्रा.डॉ. अमोल राऊत यांनी केले या कार्यक्रमाचे सूत्रसंचालन इंग्रजी विभागाचे प्रा. डॉ. सचिन तेलखडे यांनी केले.

दाते महाविद्यालयात आंतर महाविद्यालयीन हॉकी (पुरुष) स्पर्धा संपन्न

संत गाडगे बाबा अमरावती विद्यापीठ अंतर्गत 28/11/2022 ते 30/11/2022 आंतर महाविद्यालयीन हॉकी स्पर्धेचे आयोजन बाबाजी दाते कला आणी वाणिज्य महाविद्यालया तर्फे पोलीस मुख्यालय (तहसील जवळ) मैदानावर करण्यात आले. या कार्यक्रमात ज्येष्ठ समाजसेविका मीरा फडणीस यांनी हॉकी स्पर्धेचे उद्घाटन केले. या कार्यक्रमात प्रमुख उपस्थिती म्हणून अनिल नायडू, बबलू यादव, मनीषा आखरे, व प्रा. डॉ. मार्कस लाकडे हे होते. या कार्यक्रमाचे प्रास्तावीक शारीरिक शिक्षक डॉ. रविजीत गावंडे यांनी केले. अध्यक्षीय भाषण अमरावती विद्यापीठ सिनेट सदस्य प्रा. डॉ. हरिदास धुर्वे यांनी केले. या कार्यक्रमाचे संचलन प्रा. डॉ. सचिन तेलखेडे यांनी केले. अंतर महाविद्यालयीन हॉकी स्पर्धेचा पहिला सामना विद्याभारती महाविद्यालय अमरावती विरुद्ध राजर्षी शाहू विज्ञान महाविद्यालय चांदुर रेल्वे यांच्या मध्ये पहिला सामना झाला. या सामन्यामध्ये राजर्षी शाहू विज्ञान महाविद्यालय चांदुर रेल्वे विजय झाले.
स्पर्धेच्या दुसऱ्या दिवशी अंतिम सामना केशरबाई लाहोटी विरुद्ध राजर्षी शाहू विज्ञान महाविद्यालय चांदुर रेल्वे यांच्यामध्ये झाला. या सामन्यात केशरबाई लाहोटी संघ विजेता तर उपविजेता राजर्षी शाहू विज्ञान महाविद्यालय चांदुर रेल्वे राहिला समारोपीय कार्यक्रमा मध्ये यवतमाळ जिल्हा अधिकारी श्रीमती नंदा खुरपुरे यांच्या हस्ते विजेत्यांना बक्षिस वितरण करण्यात आले. या कार्यक्रमाचे अध्यक्षपद प्रा. डॉ. हरिदास धुर्वे यांनी भूषविले प्रा.डॉ. सचिन तेलखडे यांनी संचालन तर शारीरिक शिक्षक डॉ. रविजीत गावंडे यांच्या आभार प्रदर्शनाने कार्यक्रमाची सांगता झाली.

दाते कॉलेज मध्ये आंतरराष्ट्रीय योग दिवस साजरा

बाबाजी दाते कला आणि वाणिज्य महाविद्यालय, यवतमाळ येथे दि. 21/06/2022 रोजी शारीरिक शिक्षण विभाग व राष्ट्रीय सेवा योजना यांच्या संयुक्त विद्यमाने आंतरराष्ट्रीय योग दिवस साजरा करण्यात आला.
कार्यक्रमाच्या अध्यक्षस्थानी संस्थेचे अध्यक्ष श्री विनायक दाते हे होते त्यांनी योगाभ्यास व प्राणायाम दैनंदिन जीवनासाठी कसे आवश्यक आहे हे सांगून योगाभ्यासाचे महत्त्व स्पष्ट करून सांगितले. शारीरिक शिक्षण विभाग प्रमुख डॉ. रविजीत गावंडे यांनी प्राणायाम तसेच योगाभ्यास घेतला. प्रस्तुत कार्यक्रमाला शिक्षक शिक्षकेतर कर्मचाऱ्यांची उपस्थिती होती.
सदर कार्यक्रमाच्या यशस्वितेकरिता रोहन गायकवाड , उमेश कांबळे, कोमल काळे , निशांत मडावी यांनी परिश्रम घेतले.

राज्यस्तरीय व्हॉलीबॉल स्पर्धेकरिता दाते कॉलेजच्या वैष्णवी शंकर वाढईची निवड

महाराष्ट्र व्हॉलीबॉल संघटना (अमरावती विभाग ) च्या वतीने "युथ" (21 वर्षाखालील ) मुले / मुली संघ निवड चाचणी दिनांक 10/04/2022 ला फ्रेंड्स व्हॉलिबॉल क्रीडा मंडळ, पहुर ( दाभा पहूर) ता. बाभुळगाव जि. यवतमाळ येथील मैदानावर आयोजित केली होती. सदर निवड चाचणीमध्ये बाबाजी दाते कला आणि वाणिज्य महाविद्यालयातील वर्ग १२ वी वाणिज्य शाखेतील उत्कृष्ट व्हॉलीबॉल खेळाडू वैष्णवी शंकर वाढई हिची निवड २१ वर्षाचे आतील राज्यस्तरीय व्हॉलीबॉल स्पर्धेकरिता करण्यात आली. विशूद्ध विघालय व वाणिज्य महाविद्यालय न्यासाचे अध्यक्ष मा.श्री. विनायक दाते, न्यासाच्या सदसस्या सौ. सुषमा दाते , प्रशिक्षक प्रा.अभिजीत पवार, संचालक डॉ. रविजीत गावंडे, राहुल कराळे, निखिल गुजर, राहुल कराळे, राणाप्रताप क्रीडा मंडळ यांना तिचे अभिनंदन केले व पुढील वाटचालीसाठी शुभेच्छा दिल्या.

क्रीडा संमेलनाचा बक्षीस वितरण समारंभ

आजादी का अमृत महोत्सव अंतर्गत घेण्यात आलेल्या क्रीडा भारती व बाबाजी दाते कला आणि वाणिज्य महाविद्यालय यांच्या संयुक्त विद्यमाने आयोजित क्रीडा संमेलनाचा बक्षीस वितरण समारंभ 6 मार्च २०२२ रोजी सायंकाळी अभ्यंकर कन्या शाळेत उत्साहात संपन्न झाला. या कार्यक्रमाला अध्यक्ष म्हणून वुमेन्स एज्युकेशन सोसायटीचे अध्यक्ष ॲड. अमरचंद दर्डा होते. सोबतच क्रीडा भारतीचे यवतमाळ जिल्हध्यक्ष सतीश फाटक, द्रोणाचार्य पुरस्कार विजेते विजय मुनिश्वर, क्रीडा उपसंचालक विजय संतान, क्रीडा भारती चे प्रांत उपाध्यक्ष डॉ. प्रकाश नंदुरकर, विशुद्ध विद्यालय न्यासाचे अध्यक्ष विनायक दाते, वुमेन्स एज्युकेशन सोसायटीचे सचिव रमेश मुणोत, जयहिंद क्रीडा मंडळाचे प्रदीप वानखडे, क्रीडा भारतीचे प्रांत मंत्री संजय खळतकर, क्रीडा भारती चे नगर अध्यक्ष अजय म्हैसाळकर व अभ्यंकर कन्या शाळेच्या मुख्याध्यापिका मोहना गंगमवार प्रमुख अतिथी म्हणून उपस्थित होते.
ध्वजारोहण, दीप प्रज्वलन व क्रीडा गीताने कार्यक्रमाची सुरुवात करण्यात आली. सतीश फाटक यांनी क्रीडा भारतीच्या जिल्हा व नगर कार्यकारणी चा परिचय करून दिला व प्रास्ताविक केले. त्यानंतर मैदानी स्पर्धेत प्राविण्य प्राप्त खेळाडूंना आकर्षक बक्षिसे देऊन सन्मानित करण्यात आले.
खो-खो स्पर्धेतील विजय संघ लोकनायक बापूजी अणे विद्यालय यवतमाळ व उपविजयी महर्षी विद्यालय यवतमाळ तसेच, मुलींच्या गटातील विजय संघ अभ्यंकर कन्या शाळा यवतमाळ व उपविजयी संघ मातोश्री रमाबाई आंबेडकर कन्या शाळा यवतमाळ यांनाही आकर्षक चषक देऊन गौरविण्यात आले. कबड्डी स्पर्धेतील मुलांचा विजय संघ बाबाजी दाते कला वाणिज्य महाविद्यालय यवतमाळ, उपविजेता संघ केंद्रीय विद्यालय यवतमाळ, मुलींचा विजयी संघ अभ्यंकर कन्या शाळा यवतमाळ व उपविजयी संघ विद्यावर्धिनी स्कॉलर स्कूल लोणबेहळ यांना आकर्षक चषक व प्रमाणपत्र देऊन गौरविण्यात आले.
सर्व खेळातील उत्कृष्ट खेळाडूंना वैयक्तिक पुरस्कार देऊन गौरविण्यात आले.
कार्यक्रमाचे मुख्य संचालन राजेश गढीकर यांनी केले. विविध स्पर्धांच्या बक्षीस वितरणाचे संचालन अनंत पांडे, महेश जोशी, प्रा. प्रेमेन्द्र रामपूरकर व राहुल ढोणे यांनी केले आभार प्रदर्शन प्राजक्ता टिकले यांनी केले. राष्ट्रगीताने कार्यक्रमाची सांगता झाली. कार्यक्रमाला मोठ्या संख्येने विविध संघटनांचे पदाधिकारी व मुख्याध्यापक वर्ग तसेच खेळाडू पालक व क्रीडाप्रेमी उपस्थित होते.

सामुहिक सूर्यनमस्कार अभियान

बाबाजी दाते कला आणि वाणिज्य महाविद्यालय IQAC अंतर्गत शारिरीक शिक्षण विभाग, क्रीडा भारती, यवतमाळ, राष्ट्रीय छात्रसेना आणि राष्ट्रीय सेवा योजना यांच्या संयुक्त विद्यमाने दिनांक १४ फेब्रुवारी २०२२ रोजी सकाळी ८:३० वा. भारतीय स्वातंत्र्याच्या अमृत महोत्सवानिमित्त ७५ कोटी सूर्य नमस्कार या अभियाना अंतर्गत सामुहिक सूर्यनमस्कार कार्यक्रमाचे आयोजन करण्यात आले होते. क्रीडा भारती ही अखिल भारतीय स्तरावर सामाजिक कार्य करणारी संस्था असून त्यांनी या वर्षात ७५ कोटी सूर्यनमस्कार योजना घराघरात आणि प्रत्येक संस्थेत, नगरात राबविण्याचा संकल्प केला. या संकल्पामध्ये प्रत्येकाने आपल्या समीधा अर्पण करण्याचा प्रयत्न करावा असे आवाहन क्रीडा भारतीच्या वतीने कण्यात आले.
सामुहिक सूर्य नमस्काराचे महत्व या धकाधकीच्या जीवनामध्ये अनन्यसाधारण असून जीवनामध्ये प्रत्येकाने दररोज व्यायम, प्राणायाम आणि सूर्य नमस्कार नित्य नियमाने करुन स्वतः सुद्रुढ राहण्याचा प्रयत्न करावा, असे मत मार्गदर्शक श्री महेश जोशी यांनी व्यक्त केले. सोबतच क्रीडा भारतीचे बोध वाक्य “खेळापासून चारित्र्य निर्मिती आणि चारित्र्य निर्मितीतून राष्ट्रनिर्मिती” या विषयी सुद्धा मौलिक मार्गदर्शन या कार्यक्रमाचे प्रांत संयोजक श्री. महेश जोशी यांनी केले.
सुरुवातीला मान्यवरांचे स्वागत करण्यात आले. या कार्यक्रमाचे प्रास्ताविक प्रा. डॉ. ताराचंद कंठाळे यांनी तर तर आभार प्रदर्शन प्रा. डॉ. रविजीत गावंडे यांनी केले.
या कार्यक्रमाला संस्थेचे अध्यक्ष मा. श्री.विनायक दाते, उपाध्यक्ष श्री. सतिश फाटक, प्रा. डॉ. क्षीरसागर, प्रा. अनंत पांडे, श्री तात्या राखे, श्री. अजय म्हैसाळकर, श्री. अभिजित दाभाळकर, सौ. मीरा फडणीस तसेच या कार्यक्रमाचे प्रांत संयोजक श्री. महेश जोशी, प्रा.डॉ.संतोषी साऊलकर आणि महाविद्यालयातील बहुसंख्य शिक्षक व शिक्षकेतर कर्मचारी उपस्थित होते.

आंतरविद्यापीठ स्पर्धेत बाबाजी दाते हाँकी अँकडमीच्या खेळाडूची निवड

संत गाडगेबाबा अमरावती विद्यापीठाने २०२१-२२ सत्रातील अमरावती विद्यापीठ निवड चाचणीचे आयोजन दिनांक ६ ते ७ डिसेंबर २०२२ रोजी अमरावती येथे करण्यात आले होते, त्यामध्ये यवतमाळ मधील बाबाजी दाते अकॅडमी येथील शिव युवराज बोरकर या खेळाडूची निवड ग्वाल्हेर येथे होणाऱ्या १६ ते २० जानेवारी २०२२ रोजी जिवाजी युनिवर्सिटी येथे होणाऱ्या आंतरविद्यापीठ स्पर्धेत संत गाडगेबाबा अमरावती विद्यापीठाच्या चमूत खेळण्यासाठी करण्यात आली. हाँकी असोसिएशन ऑफ डिस्ट्रीक्ट यवतमाळ चे सचिव सौ. मनिषा आखरे यांनी शिव बोरकरला मार्गदर्शन केले.
शिव बोरकर यास विशूद्ध विद्यालय शिक्षण संस्थेचे अध्यक्ष श्री विनायक दाते, श्री सतीश फाटक अध्यक्ष हाँकी असोसिएशन यवतमाळ, बाबाजी दाते कला आणि वाणिज्य महाविद्यालय प्राचार्य. सौ वर्षा कुळकर्णी, प्रा. रवीजीत गावंडे, अभिजीत पवार आदींनी शुभेच्छा दिल्या व त्याचे अभिनंदन केले.

24 ते 26 डिसेंबर 2021 दरम्यान जिल्हास्तरीय क्रीडा संमेलन

बाबाजी दाते कला आणि वाणिज्य महाविद्यालय आणि क्रीडा भारती यवतमाळ यांचे संयुक्त विद्यमाने दिनांक 24 ते 26 डिसेंबर 2021 दरम्यान जिल्हास्तरीय क्रीडा संमेलन आयोजित करण्यात आले होते. त्यात मैदानी स्पर्धा, कबड्डी आणि खो खो या खेळांचे आयोजन करण्यात आले होते.
दिनांक 24 डिसेंबर 2022 ला स्वातंत्र्याच्या अमृतमहोत्सवी वर्षानिमित्त जिल्हास्तरीय मैदानी स्पर्धांचे उद्घाटन नेहरू स्टेडियम येथे मोठ्या थाटात संपन्न झाले. या प्रसंगी जिल्हा क्रिडा अधिकारी श्री राठोड साहेब, क्रीडा भारती यवतमाळ जिल्हाध्यक्ष तसेच वाणिज्य महाविद्यालय न्यासाचे उपाध्यक्ष श्री सतीश फाटक, प्रांत संयोजक श्री राजेश गढीकर, शाखाध्यक्ष श्री अजय म्हैसाळकर, श्री अभिजित दाभाडकर, श्री महेश जोशी, श्री अविनाश जोशी तसेच प्रा. डॉ. हरिदास धुर्वे इत्यादी मान्यवर उपस्थित होते. स्पर्धेचे प्रास्ताविक श्री राजेश गढीकर यांनी केले.
दिनांक 25 डिसेंबर २०२१ रोजी अभ्यंकर कन्या शाळेच्या प्रांगणात कबड्डी स्पर्धेचे आयोजन करण्यात आले होते. या प्रसंगी अध्यक्ष म्हणून श्री प्रदीप जी वडनेरकर, प्रमुख पाहुणे श्री बाळासाहेब मांगुळकर, श्री मोहन गांधी, श्री सतीश फाटक, श्री राजेश गढीकर, श्री अनंत पांडे, श्री महेश जोशी, श्री अविनाश जोशी, श्री अजय म्हैसाळकर आणि अभिजित दाभाडकर प्रामुख्याने उपस्थित होते. प्रास्ताविक श्री राजेश गढीकर यांनी तर संचलन डॉ. साऊळकर यांनी केले. या खेळासाठी एकूण मुलांच्या 12 तर मुलींच्या 8 चमूनी सहभाग नोंदविला.
दिनांक 26 डिसेंबर २०२१ रोजी अभ्यंकर कन्या शाळेच्या प्रांगणात खो खो या खेळांचे आयोजन करण्यात आले होते. या प्रसंगी अध्यक्ष म्हणून श्री सतीश फाटक, प्रमुख अतिथी प्रा. डॉ. अमोल देशमुख, श्री अमन भाई, श्री अजय म्हैसाळकर, श्री अभिजित दाभाडकर, श्री अविनाश जोशी, सौ. गंगमवार मॅडम, श्री दिलीप राखे उपस्थित होते. प्रास्ताविक श्री अविनाश जोशी यांनी तर संचलन श्री अनंत पांडे यांनी केले. या स्पर्धेत एकूण 15 चमुनी सहभाग नोंदविला.

आंतरविद्यापीठ स्पर्धेत बाबाजी दाते हॉकी अकॅडमीच्या खेळाडूंची निवड

संत गाडगेबाबा अमरावती विद्यापीठाने 2021- 22 सत्रातील अमरावती विद्यापीठ निवड चाचणीचे आयोजन दिनांक ८ ते ९ डिसेंबर २०२१ रोजी अमरावती येथे करण्यात आले होते, त्यामध्ये यवतमाळ मधील बाबाजी दाते अकॅडमी येथील तीन खेळाडूंची निवड ग्वाल्हेर येथे होणाऱ्या २६ ते ३० डिसेंबर रोजी जिवाजी युनिवर्सिटी येथे होणाऱ्या आंतरविद्यापीठ स्पर्धेत संत गाडगेबाबा अमरावती विद्यापीठाचे प्रतिनिधित्व करणार आहेत. या संघात यवतमाळ जिल्ह्यातील बाबाजी दाते अकॅडमीच्या तीन खेळाडूंची निवड झालेली आहे.
विद्यापीठाच्या वतीने अमरावती येथे झालेल्या निवड चाचणी मध्ये जयश्री जनार्दन कुठे, मानसी हरिशचंद्र धुमाळ, पलक राजू सवईमूल, या हॉकी खेळाडूंची विद्यापीठ संघात निवड करण्यात आली. हे तिन्ही खेळाडू 26 डिसेंबर 2021 रोजी होणाऱ्या पश्चिम विभागीय आंतरविद्यापीठ स्पर्धेत आपल्या खेळाचे चुणूक दाखवून अमरावती विद्यापीठाचे नेतृत्व करणार आहेत. प्रशिक्षिका मनिषा आखरे यांनी या खेळाडुंना मार्गदर्शन केले होते.
खेळाडूंना विशूद्ध विद्यालय शिक्षण संस्थेचे अध्यक्ष श्री विनायक दाते तसेच श्री सतीश फाटक, प्रा. किशोर तायडे, सौ. क्षमा कळणावत यांनी शुभेच्छा दिल्या.

खेलो इंडिया अंतर्गत प्रा.डॉ.रविजीत गावंडे यांची उत्कृष्ट कामगीरी

भारतातील क्रीडा संस्कृतीला पुनर्जीवित करून तिचा दर्जा वाढविणे तसेच आंतरराष्ट्रीय स्तरावर खेळल्या जाणाऱ्या स्पर्धेचा अनुभव भारतीय खेळाडूंना व्हावा या दृष्टिकोनातून भुवनेश्वर येथे राष्ट्रीय स्तरावर पहिल्यांदा खेलो इंडिया अंतर्गत आंतरविद्यापीठ विविध खेळांचे आयोजन किट विद्यापीठाचे संस्थापक अच्युत सामंत यांच्या मार्गदर्शनात दिनांक 22 फेब्रुवारी 2020 ते 1 मार्च 2020 या कालावधीत करण्यात आले. खेलो इंडिया स्पर्धेचे उद्घाटन मा.पंतप्रधान नरेंद्र मोदी यांच्या हस्ते व्हिडिओ कॉन्फरन्सिंगद्वारे करण्यात आले. यावेळी केंद्रीय  क्रीडामंत्री किरेण रीजीजू, ओडीसाचे  मुख्यमंत्री नवीन पटनायक व इतर मान्यवर उपस्थित होते. या स्पर्धेत अंतर्गत आर्चरी बॉक्सिंग, तलवारबाजी, वेटलिफ्टिंग, कुस्ती, बॅडमिंटन, बास्केटबॉल, फुटबॉल, हॉकी, टेबल टेनिस, व्हॉलिबॉल, रब्बी आणि कबड्डी अशा 17 खेळांचे क्रीडा प्रकारांमध्ये सुमारे देशातील साडेतीन हजार खेळाडूंनी आपला सहभाग नोंदविला.
राष्ट्रीय स्तरावर मानाच्या समजल्या जाणाऱ्या खेलो इंडिया स्पर्धेकरिता संत गाडगे बाबा अमरावती विद्यापीठतून आर्चरी  संघाकरिता प्रशिक्षक व संघ व्यवस्थापक म्हणून बाबाजी दाते कला आणि वाणिज्य महाविद्यालय यवतमाळ येथील शारीरिक शिक्षण संचालक प्रा.डॉ. रविजीत गावंडे यांनी जबाबदारी पार पाडली. यांच्या मार्गदर्शनात मुलींच्या रिकव्हर संघाने रौप्यपदक (silver) प्राप्त केले तर मुलांच्या रिकव्हर व्यक्तिगत मध्ये कास्य पदक पटकावले त्यांच्या कामगिरीबद्दल सर्व स्तरातून त्यांचे कौतुक केले जात आहे.

दाते महाविद्यालयात खुले व्हॉलीबॉल सामने संपन्न

बाबाजी दाते कला आणि वाणिज्य महाविद्यालय यवतमाळ व राणाप्रताप क्रीडामंडळ यवतमाळ यांच्या संयुक्त विद्यमाने व्हॉलीबॉल स्पर्धा ३१ जानेवारी २०२० ते ०१ फेब्रुवारी २०२० या कालावधीत महाविद्यालायत आयोजित करण्यात आल्या होत्या. या स्पर्धेत एक़ुण २८ संघ सहभागी झाले. या कार्यक्रमाचे अध्यक्षस्थान गजानन चौधरी, राणाप्रताप क्रीडामंडळ अध्यक्ष यवतमाळ यांनी भूषविले.
या खुल्या सामन्याचे उद्घाटन क्रीडा भारतीचे जिल्हाध्यक्ष तथा वाणिज्य न्यासाचे उपाध्यक्ष मा.श्री. सतीश फाटक यांनी केले. वाणिज्य न्यासाचे विश्वस्त सौ. सुषमा दाते, सौ.शर्मिला फाटक, प्रा.डॉ. विकास टोणे, ताराचंद चव्हाण, बाबाराव गावंडे, साहेबराव राठोड, मनीषा चौधरी, आदी उपस्थित होते . व्हॉलीबॉल चा राष्ट्रीय खेळाडू विनीत बाबाराव गावंडे यांच्या स्मृती प्रीत्यर्थ हे सामने आयोजित करण्यात आले होते. दाते महाविद्यालयाच्या प्रांगणात नव्यानेच तयार केलेल्या दोन व्हॉलीबॉल च्या क्रीडागणांवर विद्युत प्रकाशझोतात हे सामने खेळविल्या गेले.
या स्पर्धेत अंतिम सामना S.R.P.F. पोलीस नागपूर वि. अमरावती बॉईज यांच्या मध्ये झाला त्यामध्ये अमरावती बॉईज हा संघ उपविजेता तर S.R.P.F. पोलीस नागपूर संघ विजेता राहिला. या स्पर्धेचे प्रास्ताविक शा.शि. विभाग प्रमुख डॉ. रविजीत गावंडे यांनी केले. या स्प्रधेचे संचालन प्रा.प्रेमेंद्र रामपूरकर यांनी तर आभार प्रदर्शन श्री भिसे यांनी केले.

दाते कॉलेज मध्ये विद्यापीठस्तरीय धनुर्विद्या स्पर्धेचे आयोजन

संत गाडगे बाबा अमरावती विद्यापीठ व बाबाजी दाते कला आणि वाणिज्य महाविद्यालय यांच्या संयुक्त विद्यमाने आंतरमहाविद्यालयीन धनुर्विद्या स्पर्धाचे भव्य दिव्य आयोजन शारीरिक शिक्षण विभागाच्या माध्यमाने महाविद्यालया तर्फे करण्यात आले. तसेच महाविद्यालयाच्या इतिहासात देखील हे भव्य स्वरूपाचे आयोजन ठरले. या स्पर्धेचे उद्घाटन दि ३-१०-२०१९ रोजी दाते बी.पी.एड चे प्राचार्य डॉ. राजेंद्र क्षीरसागर यांनी केले. या कार्यक्रमाचे अध्यक्ष स्थान वाणिज्य महाविद्यालय न्यासाचे उपाध्यक्ष मा.श्री.सतीष फाटक यांनी भूषविले. महाविद्यालयाच्या उपप्राचार्य डॉ. माणिक मेहरे, प्रा. डॉ. विवेक देशमुख, वाधवानी महाविद्यालयाचे प्राचार्य डॉ. जयंत चतुर, धनुर्विद्या कमिटीचे सदस्य प्रा.डॉ.प्रविण डाबरे, प्रा.अनिल वैद्य, प्रा.संजय गोहाड, प्रा.डॉ.खरात व इतर मान्यवर उपस्थित होते.
संस्थेचे उपाध्यक्ष मा.श्री.सतीश फाटक यांनी आपल्या अध्यक्षीय भाषणात सर्व मान्यवरांचे व खेळाडूचे स्वागत केले. तसेच या स्पर्धेत सहभागी झालेल्या आंतरराष्ट्रीय खेळाडूंचे त्यांनी कौतुक केले. महाविद्यालायातील शारीरिक शिक्षण संचालक प्रा.डॉ.रविजित गावंडे यांनी कार्यक्रमाचे प्रास्ताविक केले
या स्पर्धेमध्ये पंच म्हणून प्रा. गणेश विश्वकर्मा, प्रा. विकास वानखडे, प्रशिक्षक प्रफुल डांगे यांनी काम पाहाले या स्पर्धेत ४० महाविद्यालयातून 80 विद्यार्थ्यांनी सहभाग नोंदविला. या स्पर्धेचा विधिवत निकाल संत गाडगे बाबा अमरावती विद्यापीठद्वारे घोषित करण्यात येईल.

बाबाजी दाते महाविद्यालयात जागतिक योग दिन संपन्न

बाबाजी दाते कला आणि वाणिज्य महाविद्यालय, यवतमाळ येथे  21 जुन २०१९ शुक्रवार रोजी “जागतिक योग दिवस” मोठ्या उत्साहात संपन्न झाला. या प्रसंगी वाणिज्य महाविद्यालय न्यासाचे  अध्यक्ष श्री. विनायक दाते व सदस्य सौ. सुषमा दाते उपस्थित होत्या. श्री. विनायक दाते यांनी जागतिक योग दिन व दैनंदिन जीवनात योगाचे महत्त्व अनण्य याचे महत्व विषद केले. योग हा केवळ व्यायाम प्रकार नसुन जीवन शैली आहे. योगासने, कामात आनंद व मिताहार ही जीवनाची तीन सूत्रे आहेत असे त्यांनी सांगितले.
महाविद्यालयाचे उप-प्राचार्य डॉ. माणिक मेहरे तसेच वरिष्ठ, कनिष्ट सर्व प्राध्यापक वृंद, शिक्षकेत्तर कर्मचारी आणि राष्ट्रीय सेवा योजनेचे विद्यार्थी उपस्थित होते. या दिनाचे औचित्य साधून शा.शि. संचालक प्रा. डॉ. रविजीत गावंडे यांनी योगाचे वेगवेगळ्या प्रकारचे आसन करून दाखविले. सर्व उपस्थितांनी प्राणायाम व ओंकाराचा जप केला व कार्यक्रम संपन्न झाला.

मतदान प्रतिज्ञा कार्यक्रम संपन्न

भारत निवडणूक आयोगाच्या निर्देशानुसार मतदानाची टक्केवारी वाढविण्यासाठी मतदारांमध्ये जागृती निर्माण व्हावी या उद्देशाने बाबाजी दाते कला आणि वाणिज्य महाविद्यालय यवतमाळ येथे विशेष कार्यक्रमाचे आयोजन करण्यात आले. शुक्रवार दिनांक 29 मार्च 2019 रोजी महाविद्यालयामध्ये सर्व विद्यार्थ्यांना मतदान करणे बाबत प्रतिज्ञा देण्यात आली. प्रतिज्ञेचे वाचन प्रा. विवेक देशमुख यांनी केले. या प्रसंगी महाविद्यालयाच्या प्राचार्या सौ. प्रेरणा पुराणिक तसेच इतर प्राध्यापक वर्ग उपस्थित होते. शारीरिक शिक्षण विभाग आणि राज्यशास्त्र विभाग यांच्या संयुक्त विद्यमाने या कार्यक्रमाचे आयोजन करण्यात आले होते. नवीन मतदारांध्ये जागृती निर्माण करण्यासाठी विद्यार्थ्यांनकडून या संबंधी शपथ घेण्यात आली. त्यानुसार सर्व विद्यार्थी स्वतःसहित आपल्या परिसरातील सर्व नागरिकांना मतदानाचा हक्क बाजावण्याकरिता त्यांना प्रेरित करणार आहेत. या कार्यक्रमाच्या यशस्वीतेसाठी शारीरिक शिक्षण संचालक प्रा. डॉ. रविजित गावंडे तसेच राज्यशास्त्र विभाग प्रमुख डॉ. सचिन जयस्वाल यांनी प्रयत्न केले.

 

C.M.चषक Volley ball स्पर्धेचे आयोजन

भारतीय जनता युवा मोर्चा  यवतमाळ जिल्हा द्वार आयोजित जल शिवार Volley ball C.M. चषक स्पर्धा दिनांक 05 जानेवारी 2019 रोजी बाबाजी दाते कला आणि वाणिज्य महाविद्यालयात आयोजित करण्यात आल्या होत्या. सदर स्पर्धेत यवतमाळ विधानसभा क्षेत्रातील पुरूष व महिला गटांनी सहभाग नोंदवीला. पुरुष गटा मध्ये अंतिम सामना यवतमाळ vs उमरखेड यांच्यात झाला. त्यामधे उमरखेड संघ विजयी झाला तर यवतमाळ संघ उप विजेता ठरला. महिला गटा मध्ये अंतिम सामना यवतमाळ vs दिग्रस यांच्यात झाला. यामध्ये यवतमाळ संघ विजयी झाला व दिग्रस संघ उपविजेता ठरला.

पंच म्हणून प्रा. डॉ. सचिन जयस्वाल, प्रा.प्रेमेंद्र रामपूरकर, पंकज पवार, अंकुर मोहिते यांनी उत्कृष्ट कामगिरी केली. या स्पर्धेच्या यशस्वी करिता BJP जिल्हा अध्यक्ष श्री. राजेंद्र डांगे, श्री. अमोल ढोणे. प्रा. डॉ. रविजित गावंडे श्री. मनोज येडे, श्री.जीतेंद्र सातपुते, श्री. सचिन भेंडे यांनी योगदान दिले.

स्थानिक बाबाजी दाते कला आणि वाणिज्य महाविद्यालय शिवाजी नगर येथे संत गाडगे बाबा अमरावती विद्यापीठ अमरावती द्वारा आयोजीत आंतर-महाविद्यालयीन volleyball पुरूष "डी" झोनचे आयोजन दिनांक ०८-१०-२०१८ ते १२-१०-२०१८ दरम्यान करण्यात आले होते. या स्पर्धेचे उदघाटन दिनांक ०८-१०-२०१८ ला सकाळी ९.०० वाजता मा. विनायक दाते अध्यक्ष वाणिज्य महाविद्यालय न्यास, सौ. सुषमा दाते, श्री. विजय कासलीकर, प्राचार्य सौ. प्रेरणा पुराणिक तसेच या स्पर्धेचे आयोजक प्रा. डॉ. रवीजित गावंडे संचालक शारीरिक शिक्षण विभाग हे आवर्जून उपस्थित होते. प्रा. डॉ. राविजीत गावंडे यांनी या स्पर्धेचे महत्त्व विषद केले व पाहुण्यांचा परिचय करून दिला. मा. श्री. विनायक दाते अध्यक्ष यांनी स्पर्धेचे उदघाटन करून स्पर्धकांचा परिचय करून घेतला व त्यांना शुभेच्छा बहाल केल्या. या उदघाटन सोहळ्याचे संचलन प्रा. ताराचंद कंठाळे यांनी तर आभार डॉ. गावंडे यांनी मानले. या स्पर्धेच्या यशस्वीतेसाठी प्रा. डॉ. सचिन जयस्वाल व सर्व विद्यार्थ्यांनी परिश्रम घेतले.

वेटलिफ्टिंग विभागीय क्रीडा स्पर्धा

क्रीडा व युवक सेवा संचालनालय महाराष्ट्र राज्य पुणे, जिल्हा क्रीडा अधिकारी कार्यालय व जिल्हा क्रीडा परिषद यवतमाळ तसेच वाणिज्य महाविद्यालय यवतमाळ यांच्या संयुक्त विद्यमाने दिनांक 21 सप्टेंबर 2018 रोजी येथील दाते कॉलेज जिमखाना या ठिकाणी 17 वर्षाखालील मुले-मुली यांची वेटलिफ्टिंग   विभागीय क्रीडा स्पर्धा संपन्न झाली.

स्पर्धेच्या उद्घाटन प्रसंगी माननीय जिल्हा क्रीडा अधिकारी घनश्याम राठोड, माननीय विनायक दाते, माननीय सतीश फाटक, माननीय प्राचार्य पुराणिक मॅडम, माननीय विजय कासलीकर, माननीय ताराचंद चव्हाण, तसेच क्रीडाशिक्षक अभिजित गावंडे हे उपस्थित होते. स्पर्धेचे तांत्रिक जबाबदारी श्री पुंड श्री सचिन ढोबळे व श्री प्रणील देशमुख यांनी पार पाडली. या स्पर्धेकरिता तालुका क्रीडा अधिकारी श्री मिलमिले यांनी विशेष मदत केली

पुरुष गटात - विजय राठोड 45 किलो, अंकित मस्के 53 किलो, रितेश पवार 61 किलो, केतन पवार 67 किलो, प्रणव गीते 73 किलो, प्रमोद जाधव 81 किलो, वैभव पतंगराव 89 किलो, विनय पाटील 96 किलो, सत्यपाल 102 किलो, ऋतिक निमकर्डे 102+ किलो.

महिला गटात - दिशा किरोली 40 किलो, यशश्री सूने 45 किलो, संजना वडे 49 किलो, जयश्री वडी पिल्लेवार 53 किलो, सोनाली रेखाते 64 किलो, शिवमला डुबुकवाड 76 किलो, आदिती तायडे 83 किलो, प्रिती देशमुख 83 प्लस केलं या खेळाडूंची राज्यस्तरीय वेटलिफ्टिंग स्पर्धेसाठी निवड झाली.

व्यायाम कार्यशाळा आयोजन

दिनांक:१८/०९/२०१८ रोजी “व्यायाम कार्यशाळा आयोजित” करण्यात आली होती. आजच्या काळात बैठेकाम जास्त असून कष्टाचे काम कमी होत आहे. प्रकृती चांगली राहण्यासाठी शरीराला पुरेसा व्यायाम मिळणे आवश्यक आहे. म्हणून सध्याच्या काळात जिम आवश्यक झाले आहे. सदर जिम मधील उपकरणे कशी वापरावी, त्यापासून प्रकृतीस कोणते फायदे होतात तसेच अयोग्य वापर केल्यास त्याचे कसे दुष्परिणाम होऊ शकतात या बद्दलची माहिती कार्यशाळेत देण्यात आली.
या कार्यशाळेस अध्यक्ष म्हणून श्री. विनायक दाते, सौ. सुषमा दाते, प्राचार्य सौ. प्रेरणा पुराणिक, श्री.विजय कसलीकर, प्रा.विवेक देशमुख, प्रा. हरिदास धुर्वे, हजर होते. सदर कार्यशाळा महाविद्यालयाचे क्रीडा संचालक प्रा. डॉ. राविजीत गावंडे ,श्री. हेंरब पुंड, व श्री. अनिरुद्ध पटाईत यांनी आयोजीत केली होती. या कार्यशाळेत सुमारे २५ ते ३० विद्यार्थी उपस्थित होते. या कार्यशाळेची सुरवात हनुमान श्रवण सुताने करण्यात आली. या कार्यक्रमाचे संचलन श्री. हेंरब पुंड यांनी केले तर आभार प्रदर्शन प्रा.डॉ.राविजीत गावंडे यांनी केले.